Heydər Əliyev Sarayında, Naxçıvan Muxtar Respublikasının Mədəniyyət Nazirliyinin tabeliyində fəaliyyət göstərən musiqi təhsili müəssisələrinin müəllimlərinin 1-ci konfransı keçirilib. Konfransdan əvvəl, Ümummilli Lider Heydər Əliyevin və Azərbaycanın ərazi bütövlüyü uğrunda canlarını qurban vermiş şəhidlərin xatirəsi bir dəqiqəlik sükutla yad edilib. Daha sonra Dövlət Himni səsləndirilib.

Konfransda çıxış edən Mədəniyyət nazirinin müavini, nazir vəzifələrini icra edən Həsən Seyidov musiqi təhsili müəssisələrinin fəaliyyət göstəriciləri üzrə 5 illik analitik təhlil təqdim edib. Ayrıca, Azərbaycan Respublikasının Mədəniyyət Nazirliyinin kollegiya qərarına əsasən təsdiq edilmiş İncəsənət məktəb və mərkəzlərinin Nümunəvi əsasnaməsi, Təlimat və Tərtibat planı ilə bağlı konfrans iştirakçılarını məlumatlandırıb.

Nazirliyin Aparat rəhbəri Kamandar Ələkbərov ölkədə tədris olunan musiqi təhsili müəssisələrinin təhsilverənlərinin attestasiya məsələsi ilə bağlı çıxış edərək, 2026-cı ildə keçiriləcək attestasiya üçün şərtləri və zəruri hazırlıq məsələlərinə dair məlumat verib. Daha sonra Nazirlik aparatının əməkdaşı Həcərxanım Məmmədova 2025-2026-cı tədris ilindən tətbiq olunacaq İncəsənət Məktəblərinin Elektron Məlumat Sisteminin (İMES) istifadəsi qaydaları və nəzarət mexanizmi haqqında ətraflı məlumat verib.

Sonda konfransda müzakirə olunan məsələlərlə bağlı müəllimlərin sualları cavablandırılıb. Bu konfrans, musiqi təhsili sahəsindəki inkişafların müzakirəsi və təhsil sisteminin modernləşdirilməsi üçün əlverişli bir platforma olmuşdur.

Saleh Çağdaş, Arazmedia.az

Mənbə: Mədəniyyət Nazirliyində konfrans keçirilib