2025-ci ilin Azərbaycanda "Konstitusiya və Suverenlik ili" elan edilməsi ölkənin hüquqi və dövlətçilik tarixində mühüm mərhələ kimi qiymətləndirilir. Bu təqvim ili həm konstitusional dövrərin möhkəmləndirilməsi, həm də milli suverenliyin gücləndirilməsi baxımından simvolik mənaya malikdir. Məhz bu kontekstdə yeni konstitusiya islahatları və mümkün referendum ehtimali gündəmə gəlib.

Milli Məclisin Hüquq siyasəti və dövlət quruculuğu komitəsinin üzvü Bəhruz Məhərrəmov Modern.az-a açıqlamasında bildirib ki, Azərbaycanın Vətən müharibəsində və antiterror tədbirlərindəki böyük zəfəri ilin Konstitusiyamızın bəyan etdiyi niyyətləri ərazi bütövlüyümüzün və suverenliyimizin tam bərpa olunması ilə tamamlanıb. Onun sözlərinə görə, eyni zamanda yaranan yeni reallıqlar onsuz da daim inkişafda olan münasibətlər sisteminə və idarəçilik formatına da təsirsiz ötüşməyib, daha effektiv yanaşmaların mümkünlüyü perspektivini meydana çıxarıb.

“İlbəttə, bu, qanunvericilik sistemində də islahatlar zərurətini çevirib. Məlumdur ki, zəfərimizdən sonra yaranan yeni reallıqda qanunvericiliyin təkmilləşdirilməsi istiqamətində önəmli addımlar atılmış və bu proses davam etməkdədir” - deyə deputat vurğulayıb.

Deputatın sözlərinə görə, Konstitusiya islahatlarına gəldikdə, zamanla ana qanunumuza əlavələr və dəyişikliklər edilib və bu proses cari və sonraki dövrdə də istisna edilə bilməz:

“152-ci maddəyə əsasən, Azərbaycan Respublikası Konstitusiyasının mətnində dəyişikliklər yalnız referendumla qəbul edilə bilər. Referendum isə özlüyündə mürəkkəb prosesdir və hansı qaydada keçirilməsi imkanları və prosedurları konstitusion qaydada müəyyənləşib” - deyə deputat qeyd edib.

Beləliklə, 2025-ci ilin "Konstitusiya və Suverenlik ili" elan edilməsi, Azərbaycan Respublikasının hüquqi və dövlətçilik sisteminin inkişafında yeni bir mərhələni simvollaşdırır. Bu zaman dilimində həyata keçiriləcək konstitusiya islahatları və mümkün referendumu, ölkənin gələcəyinə təsir edən kritik addımlar kimi qiymətləndirmək olar.

Azərbaycanda baş verən siyasi, hüquqi və sosial dəyişikliklər milli suverenliyin daha da güclənməsinə, eyni zamanda, dövlətin inkişafına müsbət təsir göstərəcək. Bütün bunlar, vətəndaşların hüquq və azadlıqlarının təmin edilməsi, dövlətin daha şəffaf və hesabatlı olması baxımından da əhəmiyyət kəsb edir.