Bakının Yasamal rayonunda yerləşən İzmər parkının ətrafındakı binada yaşayan sakinlər, restoran terrasından yüksələn səslər, canlı musiqi və manqal tüstüsünün onların normal həyatına mane olduğunu qeyd edərək şikayətlənirlər.

Sakinlərin iddialarına görə, bütün şikayətlərə baxmayaraq restoranın fəaliyyəti ilə bağlı ciddi dəyişiklər olmayıb. Məsələ ilə bağlı keçirilən ekoloji monitorinqlər də sakinlərin narahatlığının əsaslı olduğunu ortaya qoymuşdur. Ekologiya və Təbii Sərvətlər Nazirliyi tərəfindən aparılan ölçmələr zamanı atmosferə atılan zərərli qazların miqdarı normadan 2 dəfədən çox, səs-küy isə 70.4 desibel səviyyəsində qeyd olunub. Bu isə qanunla müəyyən edilmiş normaları xeyli aşır.

Sakinlər bildirirlər ki, hətta ötən il Yasamal Rayon Məhkəməsi restoranın saat 23:00-dan sonra musiqi səsləndirməsini qadağan edib və ümumi səs səviyyəsinin 60 desibeli keçməməsini tələbi qoyub. İddialara görə, indi bu tələblər də pozulur.

“Xəzər Xəbər” olaraq restoranla əlaqə yaratmağa çalışdıq, lakin qarşı tərəf məsələ ilə bağlı münasibət bildirməkdən imtina etdi. Sakinlər isə mübarizəni hüquqi müstəvidə davam etdirəcəklərini qeyd ediblər. O da məlum oldu ki, İzmər restoranının fəaliyyəti ilə bağlı son araşdırmaların nəticələri Ekologiya və Təbii Sərvətlər Nazirliyi tərəfindən rəsmi şəkildə təsdiqlənib.

Qurumdan bildirilib ki, restoranın fəaliyyəti zamanı havaya atılan zərərli qazlar və yüksək səs səviyyəsi norma xaricindədir. Bu səbəbdən həmin restorana cəza tətbiq olunması üçün 11 saylı Regional Ekologiya və Təbii Sərvətlər İdarəsinə tapşıq verilib.

Xəzərxeber.az mövzu ilə bağlı daha ətraflı videomaterialı təqdim edir. Restoranın fəaliyyəti və sakinlərin narazılıqları, ekoloji monitorinqlərin nəticələri və hüquqi mücadilə barədə daha geniş məlumat üçün aşağıdakı videoya baxa bilərsiniz: