Bakı şəhərində yerləşən məşhur otellərdən birinin ərazisində fəaliyyət göstərən restoran barında sosial şəbəkələrdə ciddi narazılıqlar yayılıb. Müstəqil media orqanı AzPost-un verdiyi məlumata görə, Ramada otelinin ərazisində yerləşən Marmaris restoranında müştərilərin yaşadıqları xoşagəlməz təcrübələr sosial mediada geniş müzakirə olunur.

İstifadəçilər, səhər yeməyi adı ilə getdikləri məkanda köhnə məhsullarla və bərbad xidmətlə qarşılaşdıqlarını bildiriblər. Sosial şəbəkə istifadəçisi Fatimə Amrali Sixveli, restoranın şəraitinin və xidmətinin tamamilə qənaətbəxş olmadığını qeyd edib. Onun sözlərinə görə, isti yemək sifariş verdikdən tam iki saat sonra yemək gəlib, o da cəmi bir boşqabda təqdim olunub. Fatimə, "Demək olar ki, ac gəlib evdə yedik. Çörək, meyvə, şokolad yağı - hamısı köhnə idi. Hər şey bərbad, xidmət sıfır səviyyəsində idi." - deyə əlavə edib.

Digər istifadəçi Solmaz Cahangirova isə bildirib ki, bu restoran hələ açıldığı ilk gündən narazılıqlarla gündəmə gəlir. Onun sözlərinə görə, illər əvvəl də eyni problemlərlə üzləşiblər. Restoranın yanında yerləşən otelin digər xidmətləri ilə bağlı da narazılıqlar səsləndirilib. Abbas Diyar adlı sosial şəbəkə istifadəçisi, Ramada otelinin SPA və hovuzlarının da bərbad vəziyyətdə olduğunu bildirib: "Hovuzlar xlorlu gölməçəni xatırladır. SPA isə girilməz haldadır.”

Hazırda restoran və otel rəhbərliyindən məsələ ilə bağlı hər hansı açıqlama verilməyib. Sosial şəbəkə istifadəçiləri, bu cür xidmət səviyyəsinin paytaxtın mərkəzində yerləşən və özünü nüfuzlu məkən kimi təqdim edən bir obyekt üçün qəbul edilməz olduğunu bildirirlər.