Prezident İlham Əliyev, “ADEX 2026” 6-cı Azərbaycan Beynəlxalq Müdafiə Sərgisi və “Securex Caspian 2026” 15-ci Yubiley Beynəlxalq Daxili Təhlükəsizlik, Mühafizə və Xilasetmə Avadanlıqları Sərgisinin iştirakçılarına müraciət ünvanlayıb.

Arazmedia.az xəbər verir ki, müraciətdə Prezident Əliyev sərginin açılışı münasibətilə iştirakçıları təbrik edərək, Azərbaycanın ənənəvi olaraq Bakıda təşkil olunan “ADEX” sərgisinin regionun mühüm müdafiə sənayesi platformalarından birinə çevrildiyini qeyd edib. O, bu sərgiyə olan marağın ildən-ilə artmasının, burada bir çox ölkənin və aparıcı şirkətlərin təmsil olunmasının tədbirin aktuallığını və beynəlxalq nüfuzunu artırdığını vurğulayıb.

Müraciətdə dost və tərəfdaş ölkələrin müdafiə sənayesi qurumlarını, hərbi ekspertləri və şirkətləri bir araya gətirən bu mühüm beynəlxalq sərginin mühafizə, silah sistemləri, hərbi texnika nümunələri və innovativ həllərin nümayiş etdirilməsi üçün geniş imkanlar yaratdığına diqqət çəkilib. Prezident, müdafiə qabiliyyətinin möhkəmləndirilməsi və milli təhlükəsizliyin təmin edilməsi məsələlərinin Azərbaycanın dövlət siyasətinin prioritet istiqamətlərindən biri olduğunu qeyd edib.

Eləcə də, həmin tədbirlər nəticəsində böyük inkişaf yolu keçən Azərbaycanın müdafiə sənayesinin keyfiyyətcə yeni mərhələyə qədəm qoyduğu və istehsal imkanlarını əhəmiyyətli dərəcədə genişləndirdiyi bildirilib. Yerli müəssisələrdə istehsal olunan müdafiə təyinatlı məhsulların Silahlı Qüvvələrin tərkibində mühüm yer tutduğu, beynəlxalq bazarlarda da rəqabət qabiliyyətinin artırıldığı ifadə olunub.

Azərbaycanın müdafiə sənayesi sahəsindəki nailiyyətlərin dost və tərəfdaş dövlətlərlə əməkdaşlığın dərinləşməsinə xidmət etdiyi, ölkənin müdafiə məhsullarının keyfiyyətinin beynəlxalq səviyyədə yüksək qiymətləndirildiyi vurğulanıb. “ADEX” sərgisi, ölkənin müdafiə-sənaye kompleksinin gücünün və potensialının, innovativ texnologiyalarının beynəlxalq ictimaiyyətə təqdim edilməsi baxımından xüsusilə önəmli olduğu qeyd edilib.

Paralel olaraq bu il artıq 15-ci dəfə keçirilən “Securex Caspian” sərgisinin təhlükəsizlik, mühafizə, xilasetmə və fövqəladə hallar sahələrində qabaqcıl texnologiyaların nümayiş etdirildiyi ixtisaslaşmış tədbirlərdən biri olduğu qeyd edilib. Prezident Əliyev, “ADEX” və “Securex Caspian” sərgilərinin iştirakçılar arasında yeni işgüzar əlaqələrin qurulmasına, habelə hərbi-texniki əməkdaşlığın gücləndirilməsinə mühüm töhfə verəcəyinə əmin olduğunu ifadə edib.

Son olaraq, Prezident Əliyev hər kəsi bir daha ürəkdən salamlayaraq, sərgilərin işinə uğurlar arzuladığını bildirib. Göstərilən sərgilərin Azərbaycanın müdafiə sənayesinin inkişafına və beynəlxalq nüfuzunun artırılmasına xidmət edəcəyinə inandığını vurğulayıb.

Mənbə: Prezident sərgi iştirakçılarına müraciət ünvanladı