22 iyul – Milli Mətbuat Günü münasibətilə Qaradağ Rayon İcra Hakimiyyətində tədbir keçirilib. Bu tədbirdə Qaradağ Rayon İcra Hakimiyyəti başçısının səlahiyyətlərini icra edən başçının birinci müavini Emil Abbasov, Yeni Azərbaycan Partiyası Qaradağ rayon təşkilatının sədri Ilqar Ilyasov, Rayon İcra Hakimiyyəti aparatının məsul əməkdaşları, qəzetlərin, informasiya agentliklərinin, televiziya kanallarının və digər onlayn media resurslarının nümayəndələri iştirak ediblər.

Tədbiri açan Emil Abbasov milli mətbuatımızın yaranmasının 151 illiyi münasibətilə media nümayəndələrini səmimi-qəlbdən təbrik etmiş, Azərbaycan mətbuatının keçdiyi sıralı inkişaf yolundan bəhs etmişdir. O, bildirib ki, 151 illik tarixi malik Azərbaycan milli mətbuatı zəngin ənənələrə söykənir. Bu ənənələrin əsası 1875-ci ildən Həsən bəy Zərdabi tərəfindən nəşr olunan “Əkinçi” qəzeti ilə qoyulmuşdur.

Tədbirdə vurğulanmışdır ki, dövrün görkəmli ziyalıları və qələm sahibləri xalqın maarifləndirilməsində, milli şüurun formalaşmasında mühüm rol oynamış, sözün gücü ilə cəmiyyətin inkişafına əhəmiyyətli töhfələr vermişlər. Bu zəngin ənənə bu gün də Azərbaycan mətbuatında uğurla yaşayır.

Yeni Azərbaycan Partiyası Qaradağ rayon təşkilatının sədri Ilqar Ilyasov çıxışında Ümummilli Lider Heydər Əliyevin demokratik cəmiyyətin formalaşmasında mətbuatın roluna xüsusi önəm verdiyini qeyd etmiş, senzuranın ləğvi və kütləvi informasiya vasitələrinin azad, müstəqil fəaliyyət göstərməsi üçün mühüm islahatların həyata keçirildiyini vurğulamışdır. Ulu Öndərin müəyyən etdiyi bu siyasi kursun Prezident İlham Əliyevin rəhbərliyi ilə uğurla davam etdirildiyi diqqətə çatdırılmışdır.

Bildirilib ki, hazırda ölkədə media sahəsinin inkişafı, kütləvi informasiya vasitələrinin maddi-texniki bazasının möhkəmləndirilməsi və jurnalistlərin sosial rifahının yüksəldilməsi istiqamətində ardıcıl tədbirlər həyata keçirilir. Dövlət başçısının müvafiq sərəncamları ilə media nümayəndələri üçün yaşayış binalarının inşa edilərək istifadəyə verilməsi, dövlətin bu sahəyə göstərdiyi diqqət və qayğının bariz nümunəsidir.

Tədbirin sonunda Qaradağ Rayon İcra Hakimiyyəti adından kütləvi informasiya vasitələrinin nümayəndələrinə xatirə hədiyyələri və plaketlər təqdim olunmuşdur.

Bu tədbir Azərbaycan mətbuatının 151 illik yubileyi münasibətilə keçirilib və medianın rolunun artırılması, jurnalistlərin sosial rifahının yaxşılaşdırılması yönündə atılan addımları bir daha vurğulayıb.

Mənbə: Mətbuat Günü Qaradağda qeyd edildi