Abşeron rayonunda kənd təsərrüfatı təyinatlı torpaq sahələrində qanunsuz fərdə evlərin və obyektlərin tikintisi artıq adi hal almışdır. Rayon icra hakimiyyətinin himayəsi və qəsəbə icra nümayəndələrinin havadarlığı altında son illərdə maklerlər tərəfindən minlərlə qanunsuz evin tikilməsi göz önündədir.

Bildirək ki, Abşeron rayonunda kənd təsərrüfatı təyinatlı torpaq sahələrində fərdə ev və obyektlərin kütləvi tikildiyi ərazi Masazır qəsəbəsidir. Hazırda Masazır qəsəbəsində kənd təsərrüfatı təyinatlı torpaq sahələrində və magistral su xətllərinin üzərində yüzlərlə heç bir sənədi olmayan, ancaq Abşeron icra hakimiyyətindən "icazə" verilən və qəsəbə icra nümayəndiliyi tərəfindən himayə edilən evlər tikilməkdədir.

Xalq.a daxil olan məlumata görə, Masazır qəsəbəsində tikilən bütün sənədsiz fərdə evlərin tikintisinə qəsəbə icra nümayəndəsi Sahlar Həsənov "nəzarət" edir. Belə ki, qəsəbədə ev tikintisinə Abşeron rayon icra hakimiyyətindən icazə alınmasında "vasitəçi"lik missiyası Sahlar Həsənova tapşırılıb.

İddia olunur ki, Masazır qəsəbəsində sənədsiz fərdə ev tikintisinin icazəsi 4-5 min manat arasında dəyişir. Ötən illərdə bu rəqəm 2-3 min manat idisə, indi Abidin Fərzəliyev dövründə qiymətlər artıb. Kənd təsərrüfatı təyinatlı torpaq sahələrində fərdə evlərin tikintisinə himayədarlıq edən Masazır qəsəbə icra nümayəndəsi olan Sahlar Həsənov milyonçuya çevrilib.

Təkcə Masazır qəsəbəsində Sahlar Həsənova məxsus ancaq qardaşının adına sənədləşdirilmiş onlarla obyekt mövcuddur. Mətbuatda təkzib edilməyən məlumatlara görə, Sahlar Həsənov Masazırdakı kənd təsərrüfatı təyinatlı torpaq sahələrində qardaşı vasitəsilə onlarla fərdə ev tikdirərək satır. Aylıq əmək haqqı 800 manat olan qəsəbə icra nümayəndəsi Sahlar Həsənovun varidatı bir neçəyə milyonla ölçülür.

Məsələ ilə bağlı Masazır qəsəbə icra nümayəndəsi Sahlar Həsənovdan və rayon icra hakimiyyətindən münasibət öyrənmək mümkün olmadı. (Xalq.online)

Yazıda adları keçənlərin fikirlərini dərc etməyə hazırıq.