Agdam rayon Icra Hakimiyyəti növbəti tenderin yekununu vurmuşdur. Sözügedən qurum, Quzanlı qəsəbəsindəki “Das evlər” adlanan ərazidəki fərdi yaşayış evlərini əsaslı təmir edəcək.

Rəsmi məlumatda qeyd edilir ki, tenderin qalibi “FEB-222 TIXS” MMC olub. Divarların boyanması, evlərin döşəmələrinin, tavanlarının və digər bu kimi 37 adda işlərin görülməsinə görə, Icra Hakimiyyəti şirkətə 170 min 3 manat pul ödəyəcək.

Tribunainfo.az məsələyə aid açıq mənbələr üzərindən bəzi araşdırmalar aparıb. Məlum olub ki, “FEB-222 TIXS” MMC son bir ildən cəmi 4 tenderin qalibi olub. Maraqlı məqam odur ki, bu tenderlərin hamısı Agdam Icra Hakimiyyətinin keçirdiyi tenderlərdir.

Belə ki, ötən ilin oktyabrında Quzanlı qəsəbəsində “Das evlər” adlanan ərazidə fərdi yaşayış evlərinin əsaslı təmiri işi reallaşdırılmışdır. “FEB-222 TIXS” MMC buna görə, 164 min 436 manatlıq satınalma müqaviləsi bağlayıb.

Əlavə olaraq, həmin ilin noyabrında MMC Icra Hakimiyyətinə istehsalat nəqliyyat vasitələri alıb. Bu müqavilənin dəyəri isə 51 min 896 manat təşkil edib.

Agdam rayon Quzanlı qəsəbəsi ərazisində abadlıq və yaşıllaşdırma işlərinin görülməsi isə ötən ilin dekabrında baş tutub. Bu tenderin qalibi olan “FEB-222 TIXS” MMC Agdam Icra Hakimiyyətindən 191 min 984 manatlıq sifariş alıb.

Qeyd edək ki, “FEB-222 TIXS” MMC Bakı şəhəri, Yasamal rayonu, Şərifzadə küçəsi, ev 69, m.22-də qeydiyyatdadır. Şirkətin nizamnamə kapitalı 10 manat təşkil edir. MMC-nin qanuni təmsilçisi Bagirov Fərhad Elmdar oğludur. Şirkət dövlət qeydiyyatına 20 aprel 2017-ci ildən alınmışdır.

“Vergilər” qəzetində dərc olunan məlumata görə, “FEB-222 TIXS” MMC-nin əvvəlki adı “FEB-222” olub. 7 iyun 2018-ci ildən şirkət ləğv edilib. Onun bazasında isə yenisi yaradılıb.

Bu şirkətin yalnız Agdam Icra Hakimiyyətinin tenderlərini udması maraqlı olduğu qədər, həm də mübahisəlidir. Xatırladaq ki, Agdamın icra başçısı Vaqif Həsənovdur. O, 28 avqust 2018-ci ildən rayonu idarə edir.

Yazıda adı keçən tərəflərin də mövqeyini dərc etməyə hazırıq.

Tribunainfo.az