Futbol üzrə U-21 millisinin üzvü Emre Kaplan Azərbaycan millisində oynamaqdan imtina edib.
Bu barədə futbolçu “Instagram” hesabında yazıb.
“Təşəkkürlər Azərbaycan! Formasını geyinməkdən böyük qürur və xoşbəxtlik hiss etdiyim Azərbaycan milli komandaları ilə vidalaşarkən üzərimdə əməyi olan bütün məşqçilərə, işçilərə və birlikdə oynadığım komanda yoldaşlarıma təşəkkür edirəm. Dost və qardaş ölkəmizin milli komandalarından ayrılarkən bundan sonra ay-ulduzlu formanı tərlədəcək olmağın həyəcanını və qürurunu yaşayıram”, - deyə E.Kaplan yazıb.
Xatırladaq ki, “İstanbul Başakşehir” klubunun sol cinah müdafiəçisi Emre Kaplan Azərbaycanın U-19 və U-21 yığmalarının üzvü olub. Bir müddət öncə futbolçu Türkiyə milli komandasından təklif alıb.
