Ekstradisiya Haqqında Məlumat

13 dekabr 1957-ci il tarixli Avropa Konvensiyasının tələblərinə uyğun olaraq Gürcüstan vətəndaşı Samilov Elşən Həsən oğlunun ekstradisiyası barədə Baş Prokurorluğun müraciəti Almaniya Federativ Respublikasının səlahiyyətli orqanları tərəfindən təmin edilib. Samilovun ekstradisiyası, onun törədiyi cinayətlərə görə Azərbaycan Respublikasında cəzalandırılması məqsədilə həyata keçirilir.

Baş Prokurorluğun Mətbuat xidmətindən Arazmedia.az-a verilən məlumata görə, Bakının Nərimanov rayon prokurorluğunda aparılan ibtidai istintaq nəticəsində Elşən Samilovun Əfqan Əliyev və Hidayət Həsənovla birgə 30.07.1993-cü il tarixində tamah məqsədli mülkiyyətə basqın edərək bir nəfəri qətlə yetirməsi ilə bağlı müvafiq sübutlar müəyyən edilib. Bununla yanaşı, qeyd olunan şəxslərin müxtəlif vaxtlarda digər cinayətlər törətməsi ilə bağlı da əsaslı sübutlar aşkar edilib.

Bu səbəbdən, Elşən Samilovun cinayət məsuliyyətinə cəlb olunması ilə bağlı qərar qəbul edilib. O, istintaqdan yayınaraq gizlənməyə başladığı üçün 08.05.2025-ci il tarixində İnterpolun Azərbaycanın Milli Mərkəzi Bürosu vasitəsilə beynəlxalq axtarış elan edilib. Keçirilmiş əməliyyat-axtarış tədbirləri nəticəsində o, Almaniya ərazisində müəyyən edilərək saxlanılıb.

Hazırda Elşən Samilovun ölkəyə gətirilməsi istiqamətində Ədliyyə Nazirliyinin Penitensiar Xidməti tərəfindən tədbirlər görülür. Nazirlik, axtarışda olan digər şəxslərin xarici ölkələrdə müəyyən edilməsi və onların Azərbaycan Respublikasına gətirilməsi məqsədilə xarici tərəfdaş qurumlarla, o cümlədən İnterpol ilə sıx əməkdaşlıq edir.

Mənbə: 1993-cü ildə qətl törədən şəxs Almaniyadan Azərbaycana gətiriləcək