Ali təhsil müəssisələrinə qəbul imtahanının 2-ci mərhələsinin 1-ci cəhdi üçün abituriyentlərin qeydiyyatı sona yaxınlaşır.

Arazmedia.az-a verilən məlumata görə, Azərbaycan Dövlət İmtahan Mərkəzi (DIM) tərəfindən açıqlanan məlumata əsasən, I, II, III və IV ixtisas qrupları üzrə qəbul imtahanının 2-ci mərhələsinin 1-ci cəhdi üçün iştirak etmək istəyən abituriyentlərin qeydiyyatı 29 aprel saat 23:59-dək davam edəcəkdir. Abituriyentlər şəxsi kabinetinin istifadəçi adı və parolundan istifadə etməklə DIM-in müvafiq internet səhifəsinə (https://eservices.dim.gov.az/erizebak/cehd1/) daxil olaraq, imtahan vermək istədikləri ixtisas qrupunu seçib qeydiyyatdan keçməlidirlər.

28 aprel saat 10:30-a olan məlumata əsasən, I ixtisas qrupu üzrə 31,425, II ixtisas qrupu üzrə 25,867, III ixtisas qrupu üzrə 26,057, IV ixtisas qrupu üzrə isə 6,222 olmaqla, ümumilikdə 89,571 abituriyent qeydiyyatdan keçmişdir. İmtahanda yalnız göstərilən tarixdə qeydiyyatdan keçmiş abituriyentlər iştirak edə biləcəklər.

Qeyd edək ki, ali təhsil müəssisələrinə qəbul imtahanının ikinci mərhələsinin birinci cəhdi mayın 24-də II və III ixtisas qrupları üçün, iyunun 7-də isə I və IV qruplar üçün keçiriləcəkdir. III ixtisas qrupu üzrə həm DT, həm də TC altqrupunu seçən abituriyentlər üçün coğrafiya fənni üzrə əlavə imtahan iyunun 7-də keçiriləcəkdir.

Mənbə: 90 minə yaxın şəxs qəbul imtahanında iştirak üçün qeydiyyatdan keçib