Milli Məclisin Xarici müdaxilələr və hibrid təhdidlərə qarşı komissiyası 6 avqust 2025-ci il tarixli açıqlamasının davamı olaraq bildirir ki, "Facebook" sosial media və sosial şəbəkə platformasının Azərbaycan seqmentində qonşu dövlətlərdən birinin ərazisindən ölkəmizə qarşı aparılan informasiya kampaniyası avqust ayı ərzində davam edib.

Bu dezinformativ xarakterli və təxribatçı fikirləri əks etdirən kampaniya, vahid mərkəzdən idarə olunmaqla yeni yaradılmış "Caspian Xəbər", "Caspian Times", "Işıq Media", "Pro Eminent Guild", "Next Azerbaijan" və sair bu kimi səhifələr vasitəsilə həyata keçirilib.

Qeyd olunmalıdır ki, geosiyasi hədəfləri nail olmaq məqsədilə Azərbaycan Respublikasının informasiya məkanına edilən bu cür müdaxilələrin qarşısı aidiyyəti dövlət qurumları ilə birgə fəaliyyət nəticəsində müvafiq şəkildə alınır. Eyni zamanda, "Meta" şirkətinə edilən müraciətlər nəticəsində Azərbaycana qarşı fəaliyyət göstərən səhifələrin hamısı ləğv etdirilib.

Xarici müdaxilələrə və hibrid təhdidlərə qarşı komissiya vətəndaşlarımızı diqqətli olmağa, saxta informasiyalara inanmamağa çağırır. Bu cür sosial media səhifələri ilə rastlaşdıqda, Milli Məclisin [email protected] elektron poçt ünvanına məlumat verməyi xahiş edir.