ÜMİDTV.com: 27 sentyabr tarixində illərlə həsrətində olduğumuz, Erməni terror qruplaşmasının işğalı altında olan torpaqlarımızın azad edilməsi uğrunda Müdafiə Nazirliyinin əks hücum əməliyyatlarına strat verildi. Vur əmrini eşidən qəhrəman əsgərlərimiz Ali Baş Komandanın döyüş tapşırıqlarını məharətlə icra edərək erməni quldurlarına əsil cəhənnəmi yaşatdılar və bu gün də rəşadətli ordumuz torpaqlarımızı işğalçılardan azad edərək xalqımıza qələbə həyəcanı yaşadırlar.
Azərbaycan əsgərinə dəstək olmaq üçün ölkə vətəndaşları səfərbər oldu, könüllü cəbhəyə yazılanlardan tutmuş ordumuza maddi və mənəvi dəstək olanlar oldu, bu gün də bu qürurverici aksiya davam etməkdədir. Cəbhə bölgəsindən operativ və doğru məlumatları ictimaiyyətə çatdırmaq üçün jurnalistlərimiz də ən qaynar nöqtələrdə oldu və bu gün də missiyalarını qorxmadan davam etdirirlər.
Lakin ordumuzun düşmənlə üz-üzə gərgin döyüş apardığı bir vaxtda, sosial mediada cəbhə bölgəsindən üzərində press yazılmış jurnalist geyimləri ilə selfi çəkib paylaşanlar da az olmadı.
Bu gün sosial şəbəkədə diqqətimizi çəkən və müharibə şəraitində reklam xarakterli hərəkətləri ilə xoş təəssürat yaratmayan müğənni Tünzalə Ağayevanın press geyim formasında, əlində kamera ilə çəkdiyi bir foto oldu. Əlbətdə Tünzalə Ağayeva müğənni olaraq əsgərlərimizi ruhlandırmaq üçün cəbhə bölgəsində tədbir şəklində iştirak etmiş olsaydı, heç də ictimai qınağa tuş gəlməzdi. Müdafiə Nazirliyi tərəfindən Tünzalə Ağayevanın jurnalist geyimində əldə kamera cəbhə bölgəsinə buraxılmasına biabrçılıqdan bağqa bir ad vermək mümkün deyil.
Açıq yazmaq məcburiyyətindəyik. AZTV, İTV, REALTV-dən başqa bir çox internet kanalları və saytları var ki, onların da bölgəyə ezam etdiyi jurnalistlər cəbhədən birbaşa yayımlar verirlər. Lakin ölkə mediasında geniş ictimai təsirə malik medialar var ki, cəbhə bölgəsinə buraxılmırlar. Hətta onların rəsmi müraciətləri belə cavabsız qalır. Bu ayrı-seçkiliyin fərqini biz bilirik. O medialar ki, cəbhə bölgəsinə buraxılırlar, onları maliyələşdirənlər, daha doğrusu onların əsil faktiki sahibləri bəzi vəzifə səlahiyyətliləridirlər. Əli uzun, sözü kəsərli olan bu səlahiyyətlilərin hesabına, adını “bəzi” qoyduğumuz internet kanalları və saytları icazəli cəbhə bölgəsinə ezam olunaraq rahatlıqla çəkilişlərini yayımlaya bilirlər. Biz bu yazı ilə həmin media mənsublarına qarşı fikir ifadə eləmirik. Çünki həmin mediada çalışan jurnalistlərin cəbhə bölgəsində hansı təhlükələrlə üzləşdiyini görürük və yüksək dəyərləndiririk. Sözümüz onlara deyil. Bizim sözümüz media-mətbuat arasında ayrı-seçkilik yaradanlaradır ki, onların bu xoşagəlməz hərəkətləri , müstəqil və azad medianın hüquqlarının kobud şəkildə pozulmasına xidmət edir. Azərbaycanda fəaliyyət göstərən media qurumlarının hər birinin müharibə şəraitində cəbhə bölgəsinə əməkdaşlarını ezam etmək hüququ var. Çünki hərbi mübarizə ilə yanaşı, informasiya müharibəsi də olduqca zəruridir. Cəbhə bölgəsindən düşmənin təxribatlarına dair informasiyanın olduğu kimi dünyaya çatırılması məsuliyyəti məhz ölkə mediasının üzərinə düşür. Lakin bu missiyanı həyata keçirmək arzusunda olan əksər media qurumları cəbhə meydanından kənarlaşdırıldı. Acınacaqlısı odur ki, əyninə jurnalist formasını geyib əlinə kamera alan müğənni PRESS formasında cəbhə bölgəsinə buraxılır və onun selfi çəkməyinə şərait yaradılır.
Biz media olaraq kütləvi informasiya vasitələri arasında yaradılan bu ayrı-seçkiliyə qarşı qəti etirazımızı bildiririk, eyni zamanda hansısa bir müğənninin jurnalist geyimində əldə kamera cəbhə bölgəsində çəkiliş aparmasını kütləvi informasiya vasitələrinə qarşı hörmətsizlik kimi qiymətləndiririk.
Həmçinin bir media olaraq bu cür qəbuledilməz hərəkətlərə bu günə qədər susmağımızın səbəbi, ölkəmizin müharibə şəraitində olması, ordumuzun düşmən üzərində qələbəsini , Ali Baş Komandanımızın xalqımızı qələbə münasibəti ilə təbrik etməsini gözləmək idi və gözləyirik də.
Allah Ali Baş Komandanımız başda olmaqla xalqımızı və ordumuzu qorusun. Şübhəsiz ki, bu döyüşdə rəşadətli ordumuz sayəsində biz qalib gələcəyik ! Yetər ki, hər kəs öz işi ilə məşğul olsun və media arasında ayrı-seçkiliyə son qoyulsun !
Tünzalə Ağayevaya gəldikdə isə, yaxşı olardı ki, o da öz işi ilə məşğul olsun və ordumuz zəfər çalarkən qələbəni məhz müğənni geyimində qeyd edərək, Xankəndində selfi çəkdirib soaial şəbəkədə paylaşsın.
O ki qaldı Müdafiə Nazirliyinə, ilk öncə ordumuza bu döyüşdə qələbə arzulayırıq və arzu edirik ki, istər sülh, istərsə də müharibə şəraitində bütün qanuni fəaliyyəti olan media qurumlarına eyni şəraiti yaratsın.
Ümid Tv Azərbaycan
.jpg)
.jpg)
